Babban hafsan sojin kasa, Laftanar Janar Farouk Yahaya, ya yi alkawarin cewa, sojojin Najeriya za su yi nasara a kan dukkan kalubalen tsaro da ke barazana ga ci gaban zamantakewa da tattalin arzikin kasar.
Yayin da yake kaddamar da rukunin masauki da kuma hulda da sojoji a bataliya ta 73 dake Barikin Janguza dake Kano, Laftanar Janar Yahaya, ya bayyana cewa, ya ziyarci kusan daukacin rundunonin sojoji a sassa daban-daban na kasar nan, ya na mai jaddada cewa, sojojin na samun nasara a yakin da suke yi a kan masu tayar da kayar baya a dukkan sassan kasar.
“Na yi mu’amala da sojojin, na yaba musu, domin ci gaba da yin iya kokarinsu. Kuma da jajircewarsu, na ji dadin lura cewa, za mu ci gaba da cimma burinmu. Kuma tare da hadin kan masu ruwa da tsaki, za mu dakile barazanar da ke barazana ga kasarmu.
“Za mu ci gaba da tallafawa sojojin, kuma shi ya sa muka zo nan domin magance wasu batutuwan da ke faruwa a kasa, musamman wurin kwana. Mun ba da umarni matakai da yawa na masauki. Kuma ba mu jajirce ba, za mu ci gaba da goyon bayan da muke samu daga shugaban kasa.
“Muna kan gaba kuma ba za mu yi kasa a gwiwa ba. Kuma tare da sauran hukumomi, za mu yi nasara kan wadannan barazanar,” in ji shugaban rundunar.
Sai dai Gwamna Ganduje ya bayyana bukatar hadin gwiwa tsakanin Sojoji da Sojojin Sama na Najeriya, ‘Yan Sanda, DSS da sauran jami’an tsaro, kamar hukumar kwastam, NDLEA, da dai sauran su wajen yaki da kalubalen tsaro.
Subscribe to Our VIP Newsletter
[newsletter_signup_form id=1]
