Hukumar yaki da sha da fataucin miyagun kwayoyi ta kasa NDLEA, ta kama wasu masu safarar miyagun kwayoyi guda uku a kan iyaka, yayin da suke kokarin safarar Tramadol mai nauyinn kilo 225 ta hanyar Mubi da ke jihar Adamawa zuwa Jamhuriyar Kamaru.
Wadanda ake zargin sun hada da Mohammed Hussaini mai shekaru 32 da Adamu Bella mai shekaru 18 da Mohammed Umar mai shekaru 18, an kama su ne a mahadar Tsamiya, titin Madanya, Mubi dake jihar Adamawa, ranar Juma’a tare da boye kayayyakin a cikin fakitin wani magani.
Daraktan yada labarai da bayar da shawarwari na NDLEA, Femi Babafemi ne ya bayyana hakan a wata sanarwa a ranar Lahadi.
Hukumar ta kuma kama sama da kilogiram 1,500 na maganin karfi da aka shigo da su daga kasashen waje da wasu haramtattun abubuwa a samamen da aka kai a jihohin Legas da Edo.
Sai dai Babafemi ya tabbatar da cewa, jami’an a jihar Legas sun kama wani Ibrahim Musa mai shekaru 25 dauke da Tramadol da Rohynol da Diazepam da Exol-5 da kwalaben Codeine guda 18,530, a wani samame da suka kai ranar Laraba a Suru Alaba, karamar hukumar Ajeromi-Ifelodun.
Subscribe to Our VIP Newsletter
[newsletter_signup_form id=1]
