Jami’an Amurka da na Rasha za su yi shawarwari kan harkokin tsaro a ranar 10 ga watan Janairu domin tattauna damuwarsu game da ayyukan sojan da su ke yi da kuma tunkarar tashin hankalin da a ke yi kan kasar Ukraine.
Mai magana da yawun gwamnatin Biden ne ya sanar da ranar da yammacin jiya Litinin, kuma ya ce akwai yiwuwar Rasha da NATO suma za su yi tattaunawa a ranar 12 ga watan Janairu, inda za a yi wani babban taro da suka hada da Moscow, Washington da sauran kasashen Turai a ranar 13 ga watan Janairu.
Mataimakin ministan harkokin wajen Rasha Sergei Ryabkov ya tabbatar da wadannan ranakun a jiya Talata, ya kuma ce yana fatan tattaunawar da Amurka za ta yi a Geneva za ta kaddamar da wani tsari da zai bai wa Moscow wani sabon garantin tsaro daga kasashen yammacin duniya.
Wannana matakin dai wani dogon buri ne na Moscow, wanda ya firgita kasashen Yamma ta hanyar tara dubunnan dakaru kusa da Ukraine cikin watanni biyun da suka gabata.
Ryabkov ya ce, za a gudanar da taron kungiyar tsaro ta NATO a ranar 12 ga watan Janairu a Brussels na kasar Belgium, yayin da tattaunawar ta ranar 13 ga wata za ta kunshi kungiyar tsaro da hadin gwiwa a Turai mai shelwata a Vienna, wadda ta hada da Amurka da kawayenta na NATO, da kuma Rasha da Ukraine da sauran tsoffin jihohin Soviet.
Subscribe to Our VIP Newsletter
[newsletter_signup_form id=1]
