Yayin da rikicin jam’iya mai mulki, APC ya ƙi ci ya ƙi cinyewa a Jihar Kano, a na ta samun yunƙurin sasanta ɓangarorin da ke zaman doya da manja a jihar.
Bayan da kwamitin sulhu da APC ta kafa ya fara aiki a makon da ya gabata, inda ya yi iƙrarin cewa ya sulhunta tsakanin Gwamna mai ci, Abdullahi Ganduje da tsohon gwamna, Ibrahim Shekarau, alamu dai sun nuna cewa har yanzu a kwai sauran rina a kaba a game da dambarwar siyasar da ta dabaibaye jam’iyar a jihar.
Sai dai kuma, rahotanni sun nuna cewa, Jagoran APC na ƙasa, Bola Tinubu ya fara na shi yunƙurin na sasanta ɓangarori biyun a jam’iyar a Kano.
Daily Nigerian Hausa ta jiyo cewa a jiya Lahadi, Tinubu, wanda shine tsohon gwamnan Jihar Legas, ya gaiyaci Shekarau kuma sun haɗu a Legas ɗin domin sulhu tsakanin sa da abokin burmin sa, Ganduje.
Haka-zalika jaridar ta jiyo cewa shi ma Gandujen, Tinubu ya gaiyace shi, to amma ba ya ƙasar kuma da zarar ya dawo, to zai je Legas ɗin domin su tattauna da jagoran APC ɗin don shawo kan lamarin.
Tuni dai APC ta dare gida biyu a Kano, inda ɓangaren Ganduje da tsagin Shekarau ke iƙirarin cewa shine mai riƙe da shugabacin jam’iya.
A kwanannan ne dai wata babbar kotu a Abuja ta rushe shugabacin jam’iyar na jiha, ƙarƙashin Abdullahi Abbas na tsagin Ganduje, ta kuma tabbatar da Ahmadu Ɗanzago na ɓangaren Shekarau a matsayin shugaban APC a Kano.
Subscribe to Our VIP Newsletter
[newsletter_signup_form id=1]
