Rundunar Sojin Najeriya ta saki wata Soja mai suna Sofiat Akinlabi da a ka tsare bayan wani namijin kokarin da ta yi a sansanin horar da matasa masu yi wa kasa hidima a jihar Kwara.
Kakakin rundunar sojin Najeriya, Birgediya Janar Onyema Nwachukwu ne ya tabbatar da hakan a ranar Asabar.
Ya ce, “Zan iya tabbatar muku da cewa an ba da umarnin a saki sojan, kuma ya ji dadin bikin Kirsimeti tare da ‘yan uwa da abokan arziki tare da yi mata gargadi mai tsanani da kada ta sake yin irin wannan abu.”
Idan dai za a iya tunawa, rundunar sojin ta yi ikirarin cewa an tsare sojan ne, saboda ya saba wa dokokin soji da su ka haramta nuna soyayya ga jama’a da wani ma’aikacin jami’an tsaro.
Mai magana da yawun rundunar sojin wanda ya tabbatar da kamen makonnin da suk a gabata ya kara da cewa sojan ta saba ka’idojin rundunar sojin Najeriya kan yadda jami’an sojin ke gudanar da ayyukansu a lokacin da a ka tura su bakin aiki.
Nwachukwu ya ce ba a sa ran sojan macen za ta kasance da wata alaka mai ban sha’awa da wanda a ke horarwa; shiga cikin soyayya yayin da su ke sanye da kayan sawa, sannan kuma ya na da laifin kin bin umarnin rundunar soji na tsaye da kuma umarnin amfani da kafafen sada zumunta.
Tun a baya ne dai a ka ta matsa lamba a kan a saki soja mace wadda ta sumbaci masoyin ta a lokacin da ya amince zai aure ta a sansanin masu yi wa kasa hidima.
Subscribe to Our VIP Newsletter
[newsletter_signup_form id=1]
