Jami’an hukumar yaki da sha da fataucin miyagun kwayoyi ta kasa (NDLEA) ta kama tabar wiwi mai nauyin kilogiram 12,385, wani tarin ciyawar maye da aka shigo da ita daga wata kasa dake makwabtaka da jihar Legas ta hanyar ruwa.
Sanarwar mai kunshe da sa hannun jami’in hulda da jama’a na hukumar, Femi Babafemi ya sanyawa hannu tare da aiko ta zuwa ofishin PlatinumPost dake Abuja, sanarwar ta kuma ce cikin mutanen da aka kama akwai Abdulkadri Zakari mai shekaru 24 da Ka’abu Sausu mai shekaru 45 da kuma Lawrence Adie mai shekaru 27.
Bisa ga sahihan bayanan sirri ya nuna cewa an shigo da tabar wiwin mai nauyin kilo 12, 385 daga kasar Afirka ta Yamma ta cikin teku, kuma an yi jigilar su da jiragen ruwa zuwa Tekun Eko Atlantic, Victoria Island, inda za a rarraba su zuwa wuraren da dilolin ke da zama a Island, Peti Alagba da sauran su a fadin Legas da sauran jihohi.
Sama da jami’an dake yaki da muggan kwayoyi 50 ne suka afkawa bakin tekun a ranar Asabar 27 ga watan Nuwamba, 2021, inda suka kwato kayayyakin tare da dogayen manyan motoci guda biyu, wata mota kirar Toyota Sienna tare da kama mutane Uku da ake zargi.
Sanarwar ta ci gaba da cewa, wata mata ‘yar shekara 70 mai suna Misis Beatrice Aigbedion na daga cikin wadanda aka kama a wasu sassan jihar Edo da laifin kama wasu miyagun kwayoyi da suka kai kilogiram 5,000 a fadin jihar.
Ko a ranar Larabar da ta gabata, an kama Misis Aigbedion ‘yar shekara 70 da maganin tari iri-iri na Codeine, Swinol da Rohypnol, yayin da wani dila mai suna Joseph Onyemaechi mai shekaru 50 kuma an kama shi a Ikpoba Okha, Upper. Sakponba- Birnin Benin, a ranar Juma’a mai dauke da nau’ikan sinadarai na psychotropic daban-daban masu nauyin kilo 2.055. Hakazalika, an kama Gabriel Akioya da Isa Salihu a ranar Alhamis 25 ga watan Nuwamba a Irrua, Esan Central LGA tare da nau’ikan Codeine, Tramadol, Swinol da Rohypnol.
A jihar Delta kuwa, jami’an tsaro sun kai samame a Hampton Towers da Spa Hotel, Okpanam Road, Asaba, inda aka kama Dobedient Etumudor da Thompson Chukwuemeka da wasu abubuwa masu guba, yayin da wani dillalin mai suna Emeka Ben aka kama da giram 4.7 na Methamphetamine a kan hanyar Asaba zuwa Ibusa. Sauran wadanda ake tuhuma da aka kama a ranar Alhamis 25 ga watan Nuwamba a jihar da laifin yin mu’amala a Meth, Cannabis, Cocaine, da Heroin sun hada da Ifeanyi Odibe, Uche Onwurah, da Justice Obika.
A jihar Kano kuwa, an kama wani dila miyagun kwayoyi, Alhaji Bukar Malan Abdu, tare da kwato tabar wiwi mai nauyin kilogiram 143, yayin da aka kama kilo 466 na wannan magani a gidan wani Bashir Shu’aibu, dan asalin jihar Edo, amma mazaunin Kano, wanda ke sana’ar sayar da tabar wiwi. A ranar Alhamis, 25 ga watan Nuwamba, an kama wani dillalin kwaya a Maiduguri, jihar Borno, Chima Obi a wani samame da aka kai masa biyo bayan kama wani kayan kwaya mai nauyin kilo 73.2 na codeine, a wani shingen binciken hukumar NDLEA da ke Postiskum, jihar Yobe a ranar.
Subscribe to Our VIP Newsletter
[newsletter_signup_form id=1]
