Hukumar yaki da yi wa tattalin arzikin kasa ta’annati (EFCC), ta kama wasu mutane Uku da ake zargi a filin jirgin sama na Malam Aminu Kano (MAKIA), a lokacin da suke kokarin safarar katinan kudi na ATM 1,144 zuwa kasar waje.
Mai magana da yawun hukumar, Wilson Uwujaren, ya ce wadanda ake zargin akwai, Abdullahi Usman da Musa Abubakar da kuma Abdulwahid Auwalu, an kuma kama su ne tsakanin ranar 24 ga watan Nuwamba zuwa 1 ga Disamba, 2021 ta hannun jami’an ofishin hukumar na jihar Kano.
An gano cewa Abubakar da ke kan hanyarsa ta zuwa kasar hadadiyar daular larabawa Dubai, ya boye katin ATM guda 714, yayin da Usman da ke kan hanyarsa ta zuwa Saudiyya, ya na da katin ATM guda 298 a hannunsa.
A daya bangaren kuma, an kama Auwalu da katin ATM 132 a lokacin da yake kokarin shiga jirgin kasar Habasha zuwa birnin Santanbul na kasar Turkiyya.
Hukumar EFCC ta ce za a gurfanar da wadanda ake zargin a kotu da zarar ta kammala binciken ta.
Subscribe to Our VIP Newsletter
[newsletter_signup_form id=1]
