Jirgin Kasa yayi awon gaba da Tirela da babur din Adaidaita Sahu a Kano

A na fargabar wasu fasinjojin sun mutu, yayin da wani jirgin kasa da ke tafiya ya murkushe motar tirela ta Siminti ta Dangote da wani Babur din Adaidai ta Sahu mai kafa uku a jihar Kano.

Lamarin ya faru ne a kan titin Obasanjo a cikin birnin Kano da misalin karfe 11:30 na safiyar Lahadi.

Shedun gani da ido da ke gudanar da sana’o’i a kusa da titin jirgin, sun ce, sun ga tirelar ta nufo layin dogo ne a lokacin da jirgin ke gudu.

Shaidu sun ce, sun yi yunkurin taimakawa tirelar, amma direban bai lura ba.

“Lokacin da direban tirelar ya yi ƙoƙarin ketare layin dogo, jirgin ya buge motar da babur ɗin a lokaci guda,” in ji ɗaya daga cikin shaidun.

Shaidu sun ce, tuni aka garzaya da fasinjojin da ke cikin babur din zuwa asibiti a sume, yayin da direban tirelar ya tsira da ransa.

Har ya zuwa lokacin da muke kawo wannan rahoton, tirelar har yanzu ta na kife a wajen wanda mutane suka zagaye  wajen, domin ganin bata gari basu kwashe buhunan siminti na cikin motar ba, yayin da jami’an tsaro suka baiwa motar kulawa, domin kar ‘yan ganima su kwashe kayan.

Subscribe to Our VIP Newsletter

[newsletter_signup_form id=1]