Gwamnan jihar Yobe, Mai Mala Buni ya dage dokar hana amfani da babura a yankunan Arewaci da Kudancin jihar.
Hakan dai ya biyo bayan komawar al’amura a galibin yankunan tare da komawar hukumomin farar hula.
Gwamnan ya bayyana haka ne a lokacin da ya kai ziyara fadar Sarkin Nguru, domin jajanta wa jama’a kan aukuwar gobara da ta lalata kadarori na miliyoyin Naira a kasuwar Nguru.
Buni ya ce”A yanzu mazauna garin sun samu damar hawan Babura, domin gudanar da harkokinsu na yau da kullum.
“Da wannan ne mu ke gudanar da wani bangare na yakin neman zabe, domin dawo da zaman lafiya a jihar da kuma ba da damar amfani da Babura, domin bukatun jama’a,” inji shi.
Kananan hukumomi 10 da aka amince su yi amfani da baburan sun hada da Fika, Nangere, Fune, Potiskum, Jakusko, Bade, Nguru, Karasuwa, Yusufari da Machina.
Sai dai matakin ya ta’allaka ne da wasu sharudda takwas da masu tuka mota suka cika, daya daga cikinsu shi ne cewa dole ne su rika gudanar da aiki daga karfe shida na safe zuwa karfe 6 na yamma a kowace rana kuma kada a yi amfani da su wajen tallan kabu-kabu (Achaba). Mahayi daya ne kawai za a yarda ba tare da wani mutum a kan babur ba.
Ya ce”Dole ne a samar da ingantaccen rajista, lasisi da takaddun duk babura da masu keke a cikin kananan hukumomin da hukumar kula da zirga-zirgar ababen hawa ta jihar Yobe (YROTA) ke aiwatarwa”. A cewar Buni.
Idan dai za a iya tunawa gwamnatin jihar Yobe ta haramta amfani da babura a daidai lokacin da rikicin Boko Haram ya barke a cikin shekaru 12 da suka gabata.
Subscribe to Our VIP Newsletter
[newsletter_signup_form id=1]
