Tsohon shugaban kasar Najeriya, Janar Ibrahim Badamasi Babangida IBB, ya ce, tsohon shugaban mulkin sojin Najeriya, Sani Abacha, wanda ya mulki kasar daga 1993 har lokacin mutuwarsa a 1998, ya hau mulkin ne bayan ya yaudari ‘yan siyasa.
Janar Babangida ya bayyana haka ne a hirarsa da Trust TV yayin da ya ke bayyana yadda Abacha ya yaudari mutane ya kwace mulki.
Abacha, wanda IBB ya bayyana a matsayin “babban abokina”, ya kasance hafsan hafsoshin sojoji a lokacin mulkin Babangida daga 1985, kuma daga baya ya nada shi Ministan Tsaro a 1990.
Babangida ya ce,”Gwamnatin Abacha ta na da wayo. Sun san wadanda suka fi magana a kan zabe da juyin mulkin da batun 12 ga watan Yuni da sauran abubuwa”.
Sai suka fara magana da su, suka yaudare su da karfafa musu gwiwa su kawar da gwamnatin rikon-kwarya, da cewar idan sun kawar da gwamnatin rikon-kwaryar, za su dawo da su, su ba su abin da suke so mulkin dumokuradiyya, daga nan sai a kafa gwamnatin farar hula.
Babangida ya ce: ”Da wannan su ka yaudari jama’a da sauran fitattun mutane, saboda haka da Abacha ya shigo, sai ake ta murna, hankali ya kwanta; Madalla abu ya yi kyau! Abin da zai faru a gaba kuma shi ne zababbiyar gwamnatin dumokuradiyya. Ni na sani, mun sani, hakan ba zai yiwu ba, saboda maganar ita ce: (Abacha zai ce ), Me zai sa in sa kaina cikin hadari, kawai in zo in damka muku mulki?’ Wannan shi ne abin da ya faru.” In ji Babangida.
Subscribe to Our VIP Newsletter
[newsletter_signup_form id=1]
