A yayin da Ronaldo ke kokarin hadewa da Messi shi kuwa Mbappe ya karkata zuwa Liverpool

Ɗan wasan Faransa Kylian Mbappe mai shekara 23 ya kwadaitu da Liverpool bayan raina kwazon Real Madrid a karawarsu ta zakarun Turai da kungiyarsa ta Paris St-Germain. (Sport, via Star)

A cewar BBC, sai dai, PSG a shirya take ta biya Mbappe makudan kudaden da zai kai shi ga zama ɗan wasa mafi tsada a duniya, za ta ke biyansa kusan £1m a kowanne mako a kokarin hana shi tafiya. (Independent)

Dan wasan Manchester United Cristiano Ronaldo mai shekara 37 na iya haduwa da abokin hamayyarsa ɗan kasar Argentina Lionel Messi mai shekara 34, a kaka mai zuwa a Paris St-Germain. (Mirror)

Real Madrid ta soma shirye-shiryen cefano ɗan wasan Arsenal mai shekara 24 Kieran Tierney zuwa Bernabeu. (Calciomercato, via Sun)

Manchester City na ɗab da saye ɗan wasan Brazil Savio mai shekara 17 da ke taka led a Atletico Mineiro. (Fabrizio Romano)

Ɗan wasan West Ham da Ingila Declan Rice na fatan burinsa ya cika na komawa Chelsea bayan Thomas Tuchel ya yanke hukuncin dauko Conor Gallagher mai shekara 22. (Standard)

Newcastle na shirin gabatar da tayi kan ɗan wasan Sevilla mai shekara 28 Diego Carlos. (Marca, via Sun)

Tsohon ɗan wasan Amurka da ya rike koci a Red Bull Salzburg da RB Leipzig Jesse Marsch ya kasance mutum na farko da Leeds United ke fatan ya maye gurbin Marcelo Bielsa mai shekara 66 da shi, mai yiwuwa ya yi bankwana da ita nan gaba kadan. (Telegraph)

Newcastle United ta zuba ido kan ɗan wasan Belgium mai shekara 19 Jeremy Doku, da ke wasa a Rennes kuma ake kiyasta tsadarsa kan £22m. (Chronicle)

Bayan gazawa sau da dama a cinikin ɗan wasan Lille Sven Botman mai shekara 22 a watan Janairu, Newcastle United na shirin gabatar da tayin saye ɗan wasan cikin gaggawa a kaka mai zuwa. (Mirror)

Har yanzu babu wata tattaunawa tsakanin Chelsea da wakilan Antonio Rudiger kan sabon kwantiragin ɗan wasan Jamus mai shekara 28 a Stamford Bridge. (Sky Sports)

Ɗaya daga cikin daraktoci a Sevilla Monchi na da yaƙinin cewa Anthony Martial ba shi da damuwa kuma yana farin ciki bankwana da Manchester United. (Metro)

AC Milan ta bi sahun Borussia Dortmund da Barcelona a farautar ɗan wasan Morocco Noussair Mazraoui mai shekara 24, wanda ya sanar da cewa zai bar a Ajax a wannan kakar. (Fabrizio Romano)

Shugaban ƙungiyar Arsenal Vinai Venkatesham ya kare matakansu na kin kashe kudi a kasuwar cinikin ‘yan wasa a watan Janairu. (Sun)