Wasu ƙungiyar Mata a Anambra karkashin inuwar Anambra-North Women Empowerment Movement (AWEM), sun nuna rashin jin dadinsu kan ci gaba da tsare tsohon gwamnan jihar Anambra, Willie Obiano, inda suka sha alwashin yin zanga-zanga tsirara idan hukumar yaki da cin hanci da rashawa (EFCC) ta ci gaba da tsare shi a gidan yari ba tare da an gurfanar da shi a gaban kotun shari’a ba.
AWEM sun bayyana haka ne a lokacin da suke mayar da martani ga faifan bidiyo na Obiano a ofishin EFCC, inda aka ga tsohon gwamnan sanye da guntun wando da riga.
A cikin wata sanarwa da ta fitar ranar Litinin, shugabar kungiyar ta AWEM, Uju Ifunanya Edochie yayin da ta ke nuna rashin jin dadin ta game da ci gaba da tsare Obiano, ta yi Allah wadai da kakkausar murya da abin da ta bayyana a matsayin rikon sakainar kashi da rashin da’a wajen gudanar da shari’ar.
Ta ci gaba da cewa hukumar EFCC ba ta da tsaro idan aka yi la’akari da yadda za a iya yin faifan bidiyon wani tsohon gwamna, inda ya kamata a ce yana tsare a hannun jami’an tsaro da aikewa da jama’a a shafukan sada zumunta, domin yi wa tsohon gwamnan ba’a.
Daga nan sai kungiyar ta yi barazanar cewa za ta yi zanga-zanga tsirara a ofishin EFCC na Abuja idan EFCC ba ta gaggauta sakin tsohon gwamna Obiano ba ko kuma ta kai shi kotu.
Subscribe to Our VIP Newsletter
[newsletter_signup_form id=1]
