Zaben 2023: Ministocin da zan nada basu kai shekaru 35 – Bukola Saraki

Tsohon shugaban majalisar dattawa Bukola Saraki, ya yanki tikitin sa na jam’iyyar PDP, domin tsayawa takarar shugaban kasa a babban zaben da ake sa ran zai yi a 2023.

Daily Independent ta ruwaito a ranar Litinin din da ta gabata cewa, kungiyar matasa kwararru a Najeriya sun tara Naira miliyan 40, domin siyan fom ga dan takarar shugaban kasa a zaben 2023.

Da ya ke mayar da martani kan lamarin, Saraki ya bayyana cewa, idan ya zama shugaban kasa a 2023, zai nada ministocin da ba su kai shekara 35 ba a tafiyar sa.

A cewarsa, shirin ya yi daidai da tafiyar sa ya dade yana ganin cewa, matasa na da dimbin gudunmawar da za su taimaka wajen ci gaban Najeriya.

Da yake jawabi jim kadan bayan karbar fom din tsayawa takara, Saraki ya ce, “Da wannan mataki da ka dauka a yau, ba ni da wani zabi illa in saurari muryar matasan da ke wakiltar kashi 62 cikin 100 na ‘yan Nijeriya sama da miliyan 200.

“Don haka ne nake so in yi alkawarin cewa idan na zama shugaban Najeriya, duk mukaman ministocin gwamnati a majalisar ministoci matasa ne za su mamaye su.

“Wannan alkawari ne da ba zan yi kasa a gwiwa ba, domin na yi imanin cewa ana bukatar ra’ayoyin matasa don ciyar da ayyukan ci gaban zamani.

“An gaya min cewa a wajen siyan fom din, da yawa daga cikin ku sun ba da gudummawar Naira 200,000, Naira 500,000 kuma mafi girma shi ne Naira miliyan 2. Wannan yunƙuri da ƙoƙari nagari watakila ba a taɓa yin irinsa ba a tarihin siyasar Nijeriya.

Subscribe to Our VIP Newsletter

[newsletter_signup_form id=1]