Shugaban Majalisar Wakilai Tajudeen Abbas, ya ce za a zartar da kasafin kudin shekarar 2024 a ranar Asabar 30 ga Disamba, 2023.
Abbas ya bayyana hakan ne yayin da majalisar ta koma zamanta a ranar Talata.
Hakan na zuwa ne a yayin da ya mika sakon kwamitin kasafin kudi ga kwamitocin majalisar cewa dole ne su kammala su mika rahotonsu kan kare kasafin kudin na hukumomin gwamnati da misalin karfe 8:00 na dare ranar Talata 19 ga watan Disamba, 2023.
A cewarsa, sauran ayyukan da suka shafi kasafin kudi kamar hadawa, sarrafawa da daidaitawa za su gudana tsakanin.
Ku tuna cewa majalisar ta dakatar da zamanta ne a ranar 1 ga watan Disamba, don gudanar da tsare-tsaren kare kasafin kudi don gaggauta amincewa da kasafin kudin.
A watan Nuwamba ne shugaban kasa Bola Ahmed Tinubu ya gabatar da kasafin kudi na naira tiriliyan 27.5 na kasafin shekarar 2024.
An gabatar da kasafin ne ga taron hadin gwiwa na majalisar dokokin kasar domin tantancewa da kuma tattaunawa domin amincewar karshe.
A cikin jawabinsa, Tinubu ya bayyana cewa, “Kasafin 2024 ya kasance taken Kasafin Kudi na Sabunta Fata. Kasafin kudin da aka gabatar na neman a samu ci gaban tattalin arziki mai wadatar ayyukan yi, da kwanciyar hankali a fannin tattalin arziki, da samar da ingantacciyar yanayin zuba jari, inganta jarin bil Adama, da kuma rage fatara da kuma samar da hanyoyin samar da zaman lafiya.”
Subscribe to Our VIP Newsletter
[newsletter_signup_form id=1]
