Sweden ta ce ba za ta yi watsi da tura dakarun wanzar da zaman lafiya a Ukraine ba.
Ministar harkokin wajen Sweden, Maria Malmer Stenergard, ta bayyana hakan ta gidan rediyon Sweden.
“Yanzu dole ne mu fara yin shawarwari kan samar da zaman lafiya mai adalci da dorewa wanda ke mutunta dokokin kasa da kasa, da mutunta Ukraine, kuma, da farko, tabbatar da cewa Rasha ba za ta iya janyewa kawai ba, ta sake gina karfinta, da kai hari kan Ukraine ko wata kasa cikin ‘yan shekaru kadan.
“Idan muka samu irin wannan zaman lafiya, muna bukatar mu tabbatar da cewa za a iya kiyaye shi, kuma a lokacin, gwamnatinmu ba ta ware komai,” in ji ta.
Wannan dai na zuwa ne a daidai lokacin da firaministan kasar Birtaniya Keir Starmer ya bayyana shirinsa na aika dakaru zuwa Ukraine a wani bangare na matakan wanzar da zaman lafiya.
A jiya litinin, sakataren harkokin wajen Amurka Marco Rubio ya isa kasar Saudiyya gabanin tattaunawar da ake sa ran zai yi da jami’an Rasha da nufin kawo karshen yakin da Moscow ta shafe kusan shekaru uku ana gwabzawa a Ukraine.
A halin da ake ciki, shugaba Donald Trump na Amurka ya bayyana aniyarsa ta ganawa da takwaransa na Rasha Vladimir Putin.
An yi imanin ganawar Trump da Putin na da nufin kawo karshen yakin Ukraine.
Shugaban na Amurka wanda ya bayyana hakan a lokacin da yake zantawa da manema labarai, ya ce yana bakin kokarinsa wajen ganin an samu zaman lafiya.
Ya bayyana cewa ya yi imani da Putin da shugaban Ukraine Volodymyr Zelensky na son dakatar da fada.
Subscribe to Our VIP Newsletter
[newsletter_signup_form id=1]
