Rundunar ‘yan sandan jihar Anambra ta gano motar dan majalisar dokokin jihar, Honourable Justice Azuka, wanda ke wakiltar mazabar Onitsha North, bayan an yi garkuwa da shi ranar Talata, 24 ga Disamba, 2024, a garin Onitsha.
Kamar yadda DailyPost ta ruwaito, wasu ‘yan bindiga da ba a san ko su waye ba sun yi garkuwa da Azuka a yayin da yake dawowa gida don bikin Kirsimeti.
A wata sanarwa da mai magana da yawun ‘yan sandan jihar, Tochukwu Ikenga, ya fitar, ya bayyana cewa motar dan majalisar da aka yi garkuwa da shi an gano ta ne a lokacin aikin ceto da jami’an sashen Inland Town Division suka gudanar.
A cewarsa: “Bayan wani aiki mai zurfi da ke ci gaba, jami’an rundunar daga sashen Inland Town Division sun gano motar Honourable Justice Azuka, wanda aka yi garkuwa da shi ranar 24 ga Disamba, 2024, misalin karfe 9:20 na dare a kan titin Ugwunapampa, Onitsha.”
Ikenga ya bayyana cewa an gano motar ne a kan titin Upper Iweka ta hannun tawagar ceto. Sai dai har yanzu ba a gano inda Azuka yake ba, amma rundunar tana kara kaimi don ganin an kubutar da shi cikin koshin lafiya.
Kwamishinan ‘yan sanda na jihar, Nnaghe Obono Itam, ya umurci jami’an da su ninka kokarinsu don tabbatar da cewa an kubutar da dan majalisar cikin gaggawa.
“Mun dauki wannan lamari da matukar muhimmanci, kuma muna kira ga al’ummar gari da su taimaka wa ‘yan sanda da duk wani bayani da zai taimaka wajen ceton Honourable Justice Azuka,” in ji Ikenga.
Subscribe to Our VIP Newsletter
[newsletter_signup_form id=1]
