Gwamnatin Jihar Kano ta bayyana cewa za ta fara tuhumar dukkanin masu kaucewa biyan haraji a shekarar 2025 a matsayin wani bangare na gyaran tsarin tattara haraji.
Wannan sanarwar ta fito ne daga bakin Sanusi Bature Dawakin Tofa, mai magana da yawun Gwamna Abba Kabir Yusuf, a Kaduna, a ranar Asabar.
A cewar sanarwar, Dr. Zaid Abubakar, Shugaban Hukumar Harajin Jihar Kano (KIRS), ne ya bayyana hakan yayin gabatar da bayani ga Gwamnan a lokacin taron karawa juna sani na manyan jami’an gwamnati.
Dr. Zaid Abubakar ya bayyana cewa wannan gyaran ba yana nufin ƙara haraji ba, sai dai inganta tsarin tattara haraji da tabbatar da bin ka’idojin biyan haraji.
Sanarwar ta ci gaba da cewa Jihar Kano na sa ran samun fiye da Naira biliyan ashirin a kowane watanni 3 na shekarar 2025.
Sanarwar ta bayyana cewa don tabbatar da ingantattun gyare-gyare a cikin tattara haraji, Gwamnan zai kaddamar da sabon tsarin tattara haraji, tsarin da ake sa ran zai inganta ƙoƙarin samun kudaden shiga a shekarar 2025, wanda zai taimaka wajen aiwatar da alkawuran yakin zabe a fannoni daban-daban na ci gaban jihar.
Subscribe to Our VIP Newsletter
[newsletter_signup_form id=1]
