‘Yan Shi’a sun kashe zaman lafiya – Yan Sanda

Babban Sufeton ‘Yansanda na Najeriya, Kayode Adeolu Egbetokun, ya ce waɗanda suka kashe dakarun rundunar biyu yayin tattakin mabiya mazahabar Shi’a a Abuja ranar Lahadi “sun kashe zaman lafiya”.

Mai magana da yawun rundunar ‘yansandan Najeriya a Abuja, SP Josephine Adeh, ta ce jami’anta na tsaka da aikinsu a wani wurin bincike da ke kusa da Kasuwar Wuse ‘yan ƙungiyar ta IMN suka far musu.

Sai dai IMN ta musanta zargin, tana mai cewa mambobinta ba su kowa ba yayin tattakin nasu Arba’in.

“Kisan ‘yansandan da aka yi a bakin aikinsu abin baƙin ciki ne sosai kuma wanda ba za a amince da shi ba, saboda waɗanda suka kashe su sun kawo ƙarshen zaman lafiya,” a cewar kakakin rundunar Olumuyiwa Adejobi cikin wata sanarwa.

“IGP [Egbetokun] ya kuma tabbabatar da zaƙuwar dakarun rundunar wajen kama sauran mutanen da ke da hannu don gurfanar da su a kotu.”

Sanarwar ta ƙara da cewa rundunar ta kama mutum 97 da ake zargi da hannu a kisan.