Tsirarrun masu zanga-zanga a Kano sun fito a rana ta biyar

An samu tsirarun mutane da suka fito zanga-zanga a rana ta biyar a Kano da fara ta a sassan kasar nan.

Duk da cewa an sanya dokar hana fita a jihar, amma an tsinkayi wasu matasa na zanga-zanga a wasu yankunan birnin.

An dai sanya dokar takaita zirga-zirga a fadin jihar bayan da aka samu hatsaniya, to amma gwamnatin jihar ta sassauta dokar daga karfe 8 na safe zuwa 2 na rana.

Sai dai kuma bankuna sun kasance a rufe amma akwai na’urar ATM da ke aiki a wasu bankunan.

Manyan kasuwannin sun kasance a rufe.

Masu baburan a dai-daita suna zirga-zirga amma gidajen mai da dama duk sun kasance a rufe.

Jami’an tsaro kuma na ci gaba da kasancewa a mahimman wurare don dakile abin da ka iya tasowa.