Mazauna birnin Kyiv a kasar Ukraine sun shiga cikin firgici tare da jin ƙarar fashe-fashe da kuma jiniya da ke ta tashi a kasar.
Tuni mazauna birnin ke neman wajen mafaka a tashoshin jirgin ƙasa, suna kuma layi a wuraren cirar kuɗi na banki, da gidajen mai da manyan kantunan sayar da kayan masarufi.
Yayin da ‘yan Ukraine ɗin suka wayi gari da abin da suka daɗe suna jin tsoro na harin na Rasha, can kuma a wasu sassan kasar, cuncurundon ababan hawa ne ake gani na waɗanda suke kokarin ficewa.
Mai magana da yawun fadar shugaban ƙasar, ya ce Rasha na so ta ribaci firgicin da ta jefa fararen hula ne kawai, yana mai shawartar jama’a da kada su karaya.
To amma wannan ga alama bai kwantar da hankali ba, domin tuni wasu ‘yan kasar suka fara tsallaka iyakar ƙasar ta kudu maso yamma zuwa cikin Romania domin samun mafaka.
Ita ma Poland tuni ta samar da wurare takwas na karbar mutane, ko da za a fara neman tsira, inda za ta samar da abinci da kula da lafiya da kuma samar da bayanai.
Subscribe to Our VIP Newsletter
[newsletter_signup_form id=1]
