Shugaban Sudan ta Kudu Salva Kiir yana ziyara a birnin Moscow domin tattaunawa da shugaban ƙasar Rasha Vladimir Putin.
Ziyarar ta zo ne a daidai lokacin da Rasha da ƙasashen yammacin duniya ke ƙoƙarin neman goyon bayan ƙasashen Afirka bayan mamaye Ukraine.
Mr Kiir ya isa babban birnin ƙasar Rasha ne a ranar Laraba inda mataimakin ministan harkokin wajen ƙasar Andrey Rudenko Yurevich ya tarbe shi, kamar yadda sanarwar fadar shugaban ƙasar ta bayyana.
Ofishin Mista Kiir ya ce ganawar da zai yi da shugaba Putin a ranar Alhamis, za ta tattauna kan batutuwan da suka shafi ci gaban dangantakar ƙasashen biyu a fannoni daban-daban.
Ta kara da cewa ziyarar na da nufin kara karfafa hulɗar diflomasiyya da kuma haɗin gwiwa a ɓangaren ciniki da zuba jari da kuma tsaro.
Sanarwar ta kara da cewa shugabannin biyu za su tattauna batun ɗage takunkumin hana sayar da makamai da kuma takunkumin da aka kakaba wa wasu mutane a Sudan ta Kudu.
A watan Mayun da ya gabata ne dai Rasha ta kaurace wa kuri’ar da kwamitin sulhu na Majalisar Ɗinkin Duniya ya yi na sabunta takunkumin da aka kakaba wa Sudan ta Kudu, da suka haɗa da kwace kadarori da hana zirga-zirga da kuma sanya takunkumin makamai.
Subscribe to Our VIP Newsletter
[newsletter_signup_form id=1]
