Rundunar sojin kasar nan tare da haɗin gwiwar dakarun Task Force Tactical Patrol Squad, sun kai wani samame a wani sansanin horas da masu fafutukar kafa ƙasar Biafra (IPOB) da takwararta ta ESN a unguwar Ihechiowa dake ƙaramar hukumar Arochukwu ta jihar Abia.
A yayin farmakin, sojojin sun yi nasarar kutsawa tare da tarwatsa sansanin da kuma lalata dukkan na’urorin horas da mayaƙan da kuma kayayyakin da aka samu a wurin.
A cikin wata sanarwa da da rundunar ta wallafa a shafinta na X, ta ce, samamen da sojojinta suka kai wani muhimmin mataki ne a ƙoƙarin da ake yi na daƙile ayyukan ta’addanci da ƙungiyoyin IPOB da ESN ke yi, waɗanda ke da alaka da kalubalen tsaro da tashe-tashen hankula da ake fama da su a kan ‘yan ƙasa da ba su ji ba su gani ba da kuma jami’an tsaro a jihar.
Baya ga lalata sansanin ƴan awaren, sojojin sun kuma kai hari kan gine-ginen da ake amfani da su a matsayin maɓoya ga manyan kwamandojin ESN.
Farmakin dai na zuwa ne bayan yadda ‘yan ta’addan IPOB da ESN ke ci gaba da kai hare-hare kan fararen hula da hukumomin gwamnati a jihar Abia da ma wasu sassan Kudu maso gabashin kasar nan.
Subscribe to Our VIP Newsletter
[newsletter_signup_form id=1]
