Rundunar Sojin Ruwa ta Najeriya, NNS, Pathfinder, ta tarwatsa wasu wuraren tace, matatun ba bisa ka’ida ba, a karamar hukumar Ogba/Egbema/Ndoni dake jihar Ribas, a ci gaba da kokarin dakile satar danyen mai da ayyukan tudun mun tsira.
Aikin ya bankado tanda 45, da tafkunan ruwa 30, da ramuka 75, wadanda ke dauke da kimanin lita 60,000 na danyen mai da ake zargin an sace da lita 80,000 na man fetur da ake zargin an tace ba bisa ka’ida ba, AGO.
Hakan ya fito ne a wata sanarwa mai dauke da sa hannun kwamandan NNS Pathfinder, Commodore Cajethan Nnabuchi Aniaku.
A cewar Aniaku, aikin da aka gudanar a ranar 12 ga watan Mayun 2025, ya kuma kai ga lalata lita 33,000 na kananzir.
Ya ce, kungiyar Tactical Riverine Assault Squadron Team ta gano wasu rijiyoyi guda biyu da ke da alaka da bututun mai da ake kyautata zaton barayin mai na amfani da shi wajen dibar danyen mai zuwa sansanonin su.
Aniaku ya lura cewa kayayyakin da aka kama an gudanar da su ne bisa ka’idojin hana satar danyen mai.
Ya kara da cewa ba a kama wani mutum ba, domin wadanda ake zargin sun gudu ne bayan da suka hango tawagar sojojin ruwa da ke gabatowa.
Ya yaba da jajircewa da kwarewa na ma’aikatansa tare da jaddada kudurin sojojin ruwan Najeriya, karkashin jagorancin Vice Admiral E.I. Ogalla, don magance satar danyen man fetur da barasa ba bisa ka’ida ba, ayyukan da ya bayyana a matsayin babbar barazana ga tattalin arzikin kasa da tsaron makamashi.
Subscribe to Our VIP Newsletter
[newsletter_signup_form id=1]
