Daurin auren diyar tsohon gwamnan jihar Kano, Sanata Ibrahim Shekarau ya hada ‘yan siyasa daga jam’iyyu daban-daban a taron da a ka gudanar a ranar Juma’a.
A wajen taron, wanda mutane da yawa ke ganin tamkar nuna siyasa ce ba tare da dacin rai ba, tsohon gwamna, Musa Rabiu Kwankwaso ya zama Waliyyi, wanda ya baiwa Adamu Yusuf Maitama ‘yar Shekarau.
PlatinumPost ta rawaito cewa, Kwankwaso ya na da karfi a jam’iyyar adawa ta PDP yayin da Shekarau ke zaman Sanata a jam’iyyar APC mai mulki.
Daurin auren wanda ya gudana a masallacin Umar Bn Khattab da ke kan titin Zaria, ya samu halartar shugaban majalisar dattawa, Ahmad Lawan da Sanata Barau Jibrin da dai sauransu.
Daruruwan magoya bayan manyan jam’iyyun siyasar jihar guda biyu ne su ka halarci daurin auren, kowannensu kuma na rera wakokin goyon bayan shugabanninsa, musamman ma ‘yan Kwankwasiyya da alamar jar hula ta mamaye wurin.
Yayin da Kwankwaso ya zarce gidansa bayan an daura auren, shi kuwa Shekarau ya kai shugaban majalisar dattawa zuwa gidansa, daga bisani kuma ya raka shi, domin ta’aziyyar Kwankwaso bisa rasuwar kaninsa.
A baya Shekarau ya ziyarci gidan Kwankwaso, a ranar Alhamis, domin yin ta’aziyya.
Subscribe to Our VIP Newsletter
[newsletter_signup_form id=1]
