Mrs Abike Dabiri-Erewa, shugabar hukumar kula da ‘yan Najeriya mazauna kasashen waje (NiDCOM), ta ce hukumar na shirin kwashe ‘yan kasar daga Sudan.
Hakan na kunshe ne a cikin wata sanarwa da Mista Gabriel Odu, bangaren yada labarai, hulda da jama’a da kuma ladabi, NIDCOM, ya fitar a Abuja.
Dabiri-Erewa ya ce, Ofishin Jakadancin Najeriya a Sudan da Hukumar Ba da Agajin Gaggawa ta Kasa (NEMA) sun tsara yadda za a kwashe dalibai da ‘yan kasar da suka makale a Sudan.
Ta ce halin da ake ciki a Sudan ya sa ya zama “hadari kuma ba zai yiwu kowane jirgi ya tashi ba a wannan lokacin”.
Shugaban NIDCOM ya bayyana cewa an kona jiragen da aka ajiye a filin jirgin.
Ta kuma ce kungiyoyin agaji na neman hanyoyin samun abinci, ruwa da magunguna ga mutane.
Ta yi kira ga bangarorin da ke rikici da juna da su yi la’akari da yarjejeniyar zaman lafiyar Juba da kungiyar IGAD ta bayyana.
Ta ce yarjejeniyar wani muhimmin tsari ne na maido da zaman lafiya da kwanciyar hankali a kasar da ke fama da rikici.
A ranar Alhamis din da ta gabata ce sojojin kasar Sudan da kuma dakarun sa-kai na Rapid Support Forces (RSF) suka sanar da tsagaita bude wuta na sa’o’i 24, amma an ci gaba da gwabzawa bayan wa’adin.
Koyaya, an ba da rahoton cewa ƙarfin ya ragu sosai a safiyar Asabar.
Rikicin Sudan dai wani rikici ne da ke ci gaba da gudana tsakanin bangarorin gwamnatin sojan Sudan da ke adawa da juna.
An fara shi ne a ranar 15 ga Afrilun 2023, lokacin da rikici ya barke a fadin kasar, musamman a babban birnin kasar Khartoum da kuma yankin Darfur.
Fada ya kara tsananta a kusa da filin jirgin saman babban birnin kasar, tare da rufe sararin samaniyarsa, da kuma kusa da asibitoci, lamarin da ya kawo cikas ga yunkurin kwashe mutanen da kuma jinyar wadanda suka jikkata.
Dubban mutane ne suka jikkata. Har ila yau, fararen hula na kokawa da katsewar wutar lantarki da kuma karancin abinci.
An kuma dakatar da ayyukan agaji na Majalisar Dinkin Duniya.
Subscribe to Our VIP Newsletter
[newsletter_signup_form id=1]
