Shehu Sani ya mayar da martani a kan hana Achaba a Najeriya

Sani ya ce, ba daidai ba ne a dakatar da Okada gaba daya a jihohin da ba a cika da ‘yan bindiga da ‘yan ta’adda ba.

Sai dai ya yarda cewa, ‘yan bindiga da ‘yan ta’adda na amfani da babura a matsayin hanyar sufuri a Arewa. A cikin wani sakon Twitter, Sani ya rubuta:

“Gaskiya babura ne kawai hanyar zirga-zirgar da ‘yan ta’adda a Arewa ke amfani da su wajen kai hare-hare, amma ba daidai ba ne a hana babur (Okada) gaba daya ko da a jihohin da ba a cika ‘yan fashi da ‘yan ta’adda ba.

Gwamnatin tarayya na duba yiwuwar haramta amfani da babura da ma’adanai a kasar.

Babban Lauyan Gwamnatin Tarayya (AGF) kuma Ministan Shari’a, Abubakar Malami, ya ce, matakin zai katse kudaden da ake ba ‘yan ta’adda da ‘yan fashi a Najeriya.

Malami ya bayyana haka ne a lokacin da yake zantawa da manema labarai a fadar shugaban kasa da ke Abuja ranar Alhamis, bayan kammala taron kwamitin tsaro na kasa (NSC) da shugaban kasa Muhammadu Buhari ya jagoranta.