Sifeto-Janar na Ƴan Sanda, Usman Alkali, ya gaiyace ɓangarorin da ke rikici a jam’iya mai mulki ta APC a Jihar Kano.
A ƴan watannin da su ka gabata ne rikici ya ɓarke a APC a Kano, inda tuni jam’iyar ta dare gida biyu, lamarin da ya haifar da ɓangarori biyu a ƙarƙashin jagorancin Gwamna mai ci, Abdullahi Umar Ganduje da kuma tsohon gwamna, Sanata Ibrahim Shekarau.
A tuna cewa, ɓangaren Shekarau sun kai takardar ƙorafi zuwa ga ofishin Sifeto-Janar ɗin, in da su ke zargin tsarin Ganduje da kai hari kan ofishin Sanata Barau Jibrin a Kano.
Nan da nan suma ɓangaren Ganduje su kai kai ƙarar tsagin Shekarau gaban Sifeto-Janar ɗin a bisa zargin su Shekarau ɗin da tada zaune tsaye a jihar.
Waɗannan ƙorafe-ƙorafe ka iya zama dalilin da ya sanya Sifeto-Janar ɗin ya gaiyace su domin shawo kan matsalar.
Wakilin jaridar PlatinumPost ya gano cewa tuni wakilan ɓangarorin su ka isa shalkwatar ƴan sandan da ke gidan Louis Edet a Abuja yau Talata da safe.
Subscribe to Our VIP Newsletter
[newsletter_signup_form id=1]
