Rigobert Song ya zama sabon mai horas da Afrika ta Tsakiya

Tsohon kyaftin ɗin tawagar ƙasar Kamaru, Rigobert Song, ya zama sabon kocin tawagar Jamhuriyar Afirka ta Tsakiya, kamar yadda ma’aikatar wasannin ƙasar ta bayyana.

Tsohon ɗanwasan mai shekara 48, wanda ya yi tashe a matsayin ɗanwasan baya, ya wakilci ƙasar Kamaru a gasan cin kofin duniya guda huɗu, sannan shi ne ya horar da tawagar ƙasar Kamaru a gasar cin kofin duniya da aka yi a Qatar a shekarar 2022.

Yanzu abin da ke gabansa shi ne wasannin neman gurbin shiga gasar cin kofin duniya tsakanin Madagascar da Mali a watan Maris.

Ƙasar ce ta shida a teburin I da maki huɗu.

Song ya taka leda a ƙungiyoyin Liverpool da West Ham United da Racing Lens da Galatasaray.

A gasar cin kofin duniya da aka buga a Qatar, ya samu saɓani mai zafi da golan Manchester United Onana, wanda ya sa mai tsaron gidan ya bar gasar ana tsaka da fafatawa.