Gwamnatin Tarayya na shirin rage yawan man fetur da take bai wa kamfanin Dangote Refinery daga ganga 300,000 kullum zuwa kasa da haka, sai idan yawan man da ake hakowa a Najeriya ya karu.
Wannan yunkuri na daga cikin shirin naira-for-crude don tabbatar da isasshen mai ga duka matatun mai na cikin gida, musamman ma bayan dawo da aikin matatun Port Harcourt da Warri, wadanda ke da jimillar damar tace ganga 135,000 a kullum.
Wannan matakin zai bai wa sauran matatun damar samun kaso daga ganga 450,000 da ake nufin bai wa matatun cikin gida.
Matatar Dangote, wadda ke buƙatar ganga 650,000 a kullum, tana samun ganga 300,000, amma wannan na iya raguwa saboda farfadowar matatun Warri da Port Harcourt, da wasu masu zuwa.
Karkashin Shirin Naira-for-Crude Gwamnati ta yanke shawarar sayar da danyen mai ga matatun cikin gida a naira maimakon dala, domin rage tasirin hauhawar darajar kudin kasashen waje.
Ana zargin cewa NNPC ba ta cika alkawarin isar da ganga 385,000 ga Dangote Refinery, wanda ke iya tilasta wa kamfanin ya sayi mai daga kasashen waje.
Hukumar NUPRC ami kula da hakar mai ta fitar da rahoto kan bukatar matatun mai na cikin gida daga watan Janairu zuwa Yuni 2025, inda ta bayyana cewa za a bukaci ganga 770,500 a kullum.
Subscribe to Our VIP Newsletter
[newsletter_signup_form id=1]
