Netanyahu ya sha alwashin mayar da martani kan harin da ƴan Houthi suka kai

Firaiministan Isra’ila Benjamin Netanyahu ya sha alwashin mayar da mummunan martani kan harin makami mai linzami da ƴan tawayen Houthi suka kai kusa da wani filin jirgin sama a Isra’ila.

A cikin wani bidiyo da aka wallafa a shafukan sada zumunta, Netanyahu ya yi barazanar far wa ƙungiyar, inda ya ce: “Mun kai hari a baya, za mu kuma sake kai hari a gaba”.

Makamin mai linzami da ƴan Houthi waɗanda ke samun goyon bayan Iran suka harba daga Yemen, ya faɗa kusa da filin jirgin sama a Ben Gurion ranar Lahadi da safe, a cewar hukumomi.

Lamarin ya jikkata mutum huɗu, yayin da wasu biyu suka jikkata a kan hanyar su ta zuwa wani matsuguni, a cewar kafofin yaɗa labaran Isra’ila.

Mai magana da yawun sojojin Houthi, Yahya Saree ya bayyana a wata sanarwa da aka watsa a gidan talabijin cewa “yanzu filin jirgin saman Isra’ila ba shi da tsaron da za a iya yin tafiye-tafiye”.

Ministan tsaron Isra’ila, Israel Katz, ya faɗa a wata sanarwa cewa: “Duk wanda ya kawo mana hari, za mu mayar da martani har sau bakwai”.