Hukumar hana sha da fataucin miyagun kwayoyi ta NDLEA ta jihar Kaduna ta bayyana cewa, ta kama mutane 111 masu safarar miyagun kwayoyi, tsakanin watan Janairu zuwa Fabrairun 2022 a jihar.
Kwamandan rundunar, Umar Adoro, ne ya bayyana hakan a wata hira da kamfanin dillancin labarai na kasa (NAN), ranar Alhamis, a Kaduna.
Ya ce, yawancin wadanda ake zargin sun kai shekaru 16 zuwa 30.
Ya bayyana cewa an kama mutane 34 a watan Janairu daga cikinsu 31 maza ne, yayin da uku kuma mata ne, ya kara da cewa an kuma kama kwayoyi masu nauyin kilogiram 295.680.
“Mun kama 292.125kg na Cannabis Sativa, 0.001kg na Heroin da 3.554kg na abubuwan da ke damun kwakwalwa kamar Benalin, tramadol da sauransu.
“A watan Fabrairu, mun kama mutane 77 da ake zargi daga cikinsu 74 maza ne yayin da uku kuma mata; kuma an kama jimillar kwayoyi 320.508,” inji shi.
Adoro ya bayyana cewa daga cikin adadin magungunan da aka kama 294.101kg sun hada da Cannabis Sativa, 0.034kg Cocaine, 0.005kg Heroin yayin da 26.358kg na psychotropics da 0.010kg Methamphetamine.
Ya kara da cewa, hukumar ta kuma gano wani sabon alkalami mai dandanon Shisha, wanda dandanonsa na dauke da man wiwi, wanda matasa ke amfani da shi.
Subscribe to Our VIP Newsletter
[newsletter_signup_form id=1]
