Hukumar da ke Hana Sha da Fataucin Miyagun Ƙwayoyi ta NDLEA, ta ce, ta kama wani mutum ɗan ƙasar Suriname da ke yankin kudancin Amurka, bisa laifin safarar hodar ibilis a Najeriya.
A wani saƙo da hukumar ta wallafa a shafinta na Tuwita ta ce ta kama Dadda Lorenzo Harvey Albert da hodar ibilis ɗin da nauyinta ya kai kilogiram 9.9, wadda ya ƙunshe a cikin kwaroron-rabo tare da saka ta cikin ƙwalaben turare.
Hukumar ta ce ta kama mutumin mai shekarar 34 a filin jirgin saman birnin Fatakwal da ke kudu maso kudancin Najeriya, a lokacin da ya shiga ƙasar da ƙulli 117 na hodar ibilis.
Hakan na zuwa a daidai lokacin da hukumar ta ce ta ƙwace kilogiram 1,559.3 na tabar wiwi a faɗin jihohin ƙasar biyar, tare da ƙwace ƙwayar tramadol kimakin 648,050 a jihohin legas da imo da kuma taraba.
Subscribe to Our VIP Newsletter
[newsletter_signup_form id=1]
