Hukumar yaki da sha da fataucin miyagun kwayoyi ta kasa NDLEA, ta ce, jami’anta sun kai samame a unguwar Mushin da ke jihar Legas, inda suka kama wani Fasto mai suna David Yekini da wasu mutane 76 dauke da wasu abubuwa da ake zargin na da muggan kwayoyi ne.
Mataimakin kwamandan ayyuka da horaswa na hukumar NDLEA reshen jihar Legas, Mista Adetula Oluwarotimi ne ya bayyana hakan ga manema labarai a Legas ranar Alhamis.
Oluwarotimi ya ce, rundunar ta NDLEA 150 da jami’an soji ne suka gudanar da aikin, inda ya dauki tsawon sa’o’i shida.
Ya ce, wannan farmakin wani bangare ne na yaki da sha da fataucin miyagun kwayoyi da kuma tsaftace al’umma daga munanan abubuwa gabanin zabe mai zuwa.
“Idan ba tare da shan miyagun kwayoyi ba, aikata laifuka zai zama kadan, kuma ga NDLEA don tabbatar da zabe mai zuwa ba tare da wani laifi ba, dole ne a ziyarci,” in ji Oluwarotimi.
Mataimakin kwamandan ya ce an kama miyagun kwayoyi da suka hada da Canadian Loud da kudinsu ya kai Naira miliyan 5, Cannabis sativa mai nauyin kilogiram 146.85 da kuma gram 43.7 na Methamphetamine.
Oluwarotimi ya ce hukumar ta NDLEA za ta yi wa wadanda ake zargin tambayoyi domin sanin masu amfani da magungunan da ke bukatar gyara.
“Wadanda ke mu’amala da miyagun kwayoyi a cikinsu za a gurfanar da su a gaban kotu,” in ji shi.
Subscribe to Our VIP Newsletter
[newsletter_signup_form id=1]
