Najeriya ta fitar da wutar lantarki mai darajar Naira biliyan 181.62 zuwa ƙasashen waje a cikin watanni tara na shekarar 2024, kamar yadda rahoton Hukumar Ƙididdiga ta Ƙasa (NBS) ya bayyana. An tura wutar ne zuwa ƙasashen Jamhuriyar Nijar, Togo, da Benin.
Rahoton ya nuna cewa daga watan Janairu zuwa Maris, Najeriya ta bawa Nijar wutar lantarki da kuɗinta ya kai Naira biliyan 63.28. Daga watan Afrilu zuwa Yuni, an fitar da wuta mai darajar biliyan 58.65 zuwa Togo, yayin da daga watan Yuli zuwa Satumba aka tura wutar da kuɗinta ya kai Naira biliyan 59.69 zuwa Chadi.
Wannan na zuwa duk da Hukumar Kula da Wutar Lantarki ta Ƙasa (NERC) ta kayyade yawan wutar da za a fitar zuwa ƙasashen waje tun a watan Mayu, domin tabbatar da wadatar lantarki a Najeriya. NERC ta tsara cewa wutar da za a fitar ba za ta wuce kashi 6% na jimillar wutar da ake samarwa a ƙasar ba.
Hukumar ta bayyana cewa aiwatar da wannan matakin tun a watan Afrilu ya taimaka wajen ƙara yawan wutar lantarki da ake samu a Najeriya.
Subscribe to Our VIP Newsletter
[newsletter_signup_form id=1]
