Wani mummunan hatsarin mota da ya afku a mahadar Eldorado Cinema daura da titin filin jirgin sama a Kano, ya yi sanadin mutuwar mutane biyu tare da jikkata daya a safiyar Laraba.
Hadarin wanda ya afku da misalin karfe 8:15 na safe, ya hada da wata babbar mota kirar DAF ta kasuwanci da wani babur Jincheng mai zaman kansa. Hukumar kiyaye haddura ta kasa (FRSC) reshen jihar Kano ta danganta hatsarin da tukin mota mai hatsarin gaske.
Da yake tabbatar da faruwar lamarin, jami’in kula da ilimin jama’a na sashen, CRC Abdullahi Labaran, ya ce jami’an FRSC sun isa wurin cikin mintuna uku da samun sanarwar.
“Jami’anmu sun yi gaggawar ceto wanda aka jikkata tare da kai shi asibitin kwararru na Murtala Muhammad, yayin da aka kai mamacin asibitin koyarwa na Aminu Kano,” Labaran ya ce.
Ya kuma bayyana cewa, akwai maza shida a hadarin, inda biyu suka mutu, daya kuma ya samu munanan raunuka. Ragowar ukun dai sun tsallake rijiya da baya.
Motocin da kayayyakin da aka kwato an mika su ga ofishin ‘yan sanda na Gwagwarwa domin ci gaba da bincike. Hukumomin kasar sun bukaci masu ababen hawa da su yi taka tsantsan tare da bin ka’idojin zirga-zirga domin dakile irin wannan bala’i.
Labaran ya kara da cewa “Hukumar FRSC ta yi matukar nadamar faruwar lamarin, muna mika ta’aziyyarmu ga iyalan wadanda suka rasu tare da yi wa wadanda suka jikkata fatan samun sauki cikin gaggawa.”
Wannan hatsarin na baya-bayan nan ya nuna damuwar da ake ci gaba da yi a kan kiyaye hanyoyin Kano, inda jami’ai suka jaddada bukatar bin ka’idojin zirga-zirga.
Subscribe to Our VIP Newsletter
[newsletter_signup_form id=1]
