Hukumar EFCC ta sanar da kama fitacciyar ƴar TikTok, Murja Ibrahim Kunya saboda zargin laifin wulaƙanta takardun kuɗin Najeriya, wato naira.
Ofishin shiyya na hukumar da ke Kano ne ya sanar da hakan a cikin wata sanarwar da suka fitar, inda hukumar ta ce an kama ta ne bisa zarginta da wulaƙanta kuɗin Najeriya.
“An kama Murja Kunya ne bisa zarginta da wulakanta takardun kuɗin naira a lokacin da take zaune a otel ɗin Tahir Guest Palace a Kano. An sake kama ta ne bayan da farko ta tsere daga belin da hukumar ta ba ta kimanin wata ɗaya da ya gabata.
“Da farko an kama ta ne a watan Janairun 2025 bayan saɓa dokar amfani da kuɗi na babban bankin Najeriya, wadda ta hana wulaƙanta takardun kuɗin Najeriya wato naira. Sai hukumar ta bayar da belinta kafin a gabatar da ita a kotu a Kano, da lokacin zuwa kotu ya yi sai ta tsere, aka neme ta aka rasa.”
“Bayan makonni ana nemanta ne jami’anmu suka kama ta a ranar Lahadi 16 ga watan Maris, sannan aka mayar da ita ofishin hukumar da ke Kano.”
Sanarwar ta ƙara da cewa hukumar na shirye-shiryen gabatar da ita a kotu.
Subscribe to Our VIP Newsletter
[newsletter_signup_form id=1]
