Hukumar kashe gobara ta jihar Kano, ta yi nasarar kubutar da wani mutum mai shekaru 37 da ke daf da kashe kansa ta hanyar rataye kansa a kan bishiya.
Mutumin mai suna Saifullah Rabi’u ya ajiye takardar kashe kansa ne da ke nuni da cewa ya yanke kauna ne ya sa ya ci bashin Naira miliyan 2 da ake bin sa wajen neman bizar kasar waje.
Kakakin hukumar kashe gobara ta jihar Kano Saminu Abdullahi ya tabbatar da faruwar lamarin a wata sanarwa da ya rabawa manema labarai.
A cewar sanarwar, babban dakin kula da hukumar kashe gobara ta samu kiran gaggawa da misalin karfe 10:07 na safe daga ma’aikatar ayyuka da gidaje ta jihar Kano, inda suka kai rahoton faruwar lamarin a hanyar jihar ta gidan Sarkin Nasarawa.
Da aka samu wannan kiran, jami’an kashe gobara da ke bakin aiki sun tattaru zuwa wurin, inda suka isa da misalin karfe 10:10 na safe.
Ya ce sun samu Saifullahi Rabiu a cikin wani hali na rashin lafiya, yana kokarin kashe kansa ta hanyar rataye a jikin bishiya.
A cikin takardar kashe kansa, Rabi’u ya bayyana dimbin bashin da ake binsa, inda ya bayyana cewa tuni ya mayar da kusan Naira 500,000 na kudaden da ya karbo.
Ya koka da cewa kalubale da abin kunya daga mai karbar bashi ya sa shi ya yi tunanin kashe kansa.
Abdullahi ya bayyana cewa an mika mutumin da aka ceto Saifullah Rabiu ga jami’in kula da laifuka (D.C.O) Zaharaddini na sashin ‘yan sanda na Farm Center domin ci gaba da bincike.
Subscribe to Our VIP Newsletter
[newsletter_signup_form id=1]
