Kungiyar kare hakkin biladam ta Amnesty International ta bukaci gwamnatin Najeriya ta bi sahun sauran kasashen duniya wajen yin allah wadai da kisan kare dangin da israila ke yiwa palasdinawa.
Shugaban kungiyar a Najeriya Isa Sanusi ne yayi wannan kiran yayin gabatar da rahoton kisan kare dangin da israila keyi a matakin kasa a yau litinin a jihar Kano.
Isa Sanusi yace kasashen duniya suna da karfin ikon kawo karshen kisan kan da israila takeyi a gaza domin bata di karfin kasashen duniya ba.
Ya kuma kara da cewa Najeriya tana da matsayin shugaba a Nahiyar Afrika kuma tana da karfin ikon da za’a dauke ta da muhimmanci.
Wannan dai na zuwa kwanaki biyu bayan harin bam din da israila takai akan asibiti na karshe dake cigaba da aiki a Gaza.
Rahoton na Amnesty International ya bayyana “Ma’aikatar Lafiya ta Gaza ta bayyana cewa Palasdinawa da suka rasa rayukansu a sakamakon hare-haren Isra’ila ya kai 42,010, yayin da wasu 97,590 suka jikkata tun bayan fara rikicin a ranar 7 ga Oktoba, 2023. Sai dai ana kyautata zaton cewa adadin wadanda suka mutu na iya karuwa, musamman bayan an gama rikicin, lokacin da masu ceto za su iya gano gawawwakin da ke binne a cikin baraguzan gine-gine.”
Rahoton ya kuma bayyana yara kimanin 13,319 sun mutu.
A halin da ake ciki, dalibai kimanin 625,000 sun kasa samun ilimi tsawon shekara guda, yayin da ake kiyasta cewa kusan kashi 85% na makarantu sun lalace.
Subscribe to Our VIP Newsletter
[newsletter_signup_form id=1]
