Rundunar ‘yan sandan jihar Legas, ta tabbatar da mutuwar wani matashi mai shekaru 21 mai suna Micheal Arigbabuwo, wanda ya rasa ransa a wajen bikin zagayowar ranar haihuwarsa, bayan da aka zarge shi da hada wasu kwayoyi masu tsauri guda biyu don yin tasiri.
Jami’in hulda da jama’a na rundunar ‘yan sanda (PPRO) a jihar Legas, SP Benjamin Hundeyin ne ya bayyana hakan a wani sako da ya wallafa a shafinsa na Twitter.
Hundeyin wanda ya tabbatar da kame uku daga cikin abokan mamacin ya ce, lamarin ya faru ne a ranar Juma’a a unguwar Ikorodu da ke jihar Legas.
Ya ce bayanan da ‘yan sanda suka samu a Ikorodu sun nuna cewa da misalin karfe 7:30 na yammacin ranar Juma’a ne, aka yi kira da nuna damuwa cewa wasu ‘yan kungiyar Yahoo Yahoo sun kawo gawa zuwa yankin Igbogbo da ke Ikorodu.
“Bisa bayanin, gungun masu binciken sun ziyarci inda lamarin ya faru kuma suka dauki hoto. An kama wasu matasa uku masu shekaru 23 da 24.
“Wadanda ake zargin sun yi ikirarin cewa marigayin ya sha hayaki da karfi kuma ya sha codeine a wajen bikin zagayowar ranar haihuwar daya daga cikin abokansu da aka gudanar a yankin Igbogbo a Ikorodu.
“Wadanda ake zargin sun kara da cewa marigayin ya fara haki. An garzaya da shi asibiti amma ya mutu,” inji shi.
Hundeyin ya kara da cewa an kwashe gawar an ajiye ta a babban asibitin Ikorodu domin a tantance gawar.
Don haka ya gargadi matasa kan shaye-shayen miyagun kwayoyi, yana mai jaddada cewa, miyagun kwayoyi za su kawo karshen rayuwarsu cikin bala’i.
Subscribe to Our VIP Newsletter
[newsletter_signup_form id=1]
