Kakakin Majalisar Wakilai, Tajudeen Abbas, ya ce majalisar na daukar matakai na ganin bayan hare-haren da ake kai wa a wasu sassan kasar.
Mista Musa Krishi, mai baiwa shugaban shawara kan harkokin yada labarai da wayar da kan jama’a ne ya bayyana hakan a wata sanarwa da ya fitar a Abuja ranar Asabar.
A cewarsa, Abbas ya bayar da wannan tabbacin ne a wata ziyarar ta’aziyya da ya kai wa Sarkin Zazzau, Amb. Ahmed Bamalli.
Krishi ya ce sun kai ziyarar ne saboda rugujewar wasu sassa na babban masallacin Zariya wanda ya yi sanadin mutuwar mutane da dama tare da jikkata wasu da dama a lokacin Sallar Asuba a ranar 11 ga watan Agusta.
Ya kuma ce ziyarar ta biyo bayan harin da ‘yan bindiga suka kai a unguwar Kofar Gayan da ke Zariya a ranar 12 ga watan Agusta.
Krishi ya ce shugaban majalisar ya nuna alhininsa game da faruwar abin da bai dace ba, ya kuma tabbatar wa da shugabanni da al’ummar Masarautar Zazzau cewa majalisar ta dauki matakai da nufin dakile sake faruwar lamarin.
A cewarsa, Abbas ya tabbatar wa Sarkin cewa sojoji za su kafa wani tsari a kewayen wasu guraren da za su iya dakile hare-haren da ake kaiwa al’umma a Zariya da kewaye a nan gaba.
Ya kuma ruwaito Abbas yana cewa: “Ina so in tabbatar muku da cewa bisa ga yadda ‘yan bindiga ke son komawa, mu a majalisar mun dauki wasu matakai.
“Mun fara shigar da sojoji, kuma za su zo su kafa makarantar mata a kofar Gayan. Sun tabbatar mana cewa za su yi hakan.
“Ina kuma tabbatar muku cewa a matsayina na dan kasa kuma daya daga cikin masu rike da sarautu a wannan fada, a shirye nake na bayar da gudunmawa wajen sake gina masallacin.
“Idan lokacin aikin ya yi, ku sanar da ni don in ba da gudummawar kaso na don sake gina wannan muhimmin ginin addini.
“Mun gode muku da kuka ba mu wannan damar mu zo mu yi muku ta’aziyya.” (NAN)
Subscribe to Our VIP Newsletter
[newsletter_signup_form id=1]
