Dan wasan gaba na Belgium, Romelu Lukaku ya zarce ’yan wasa irin su Cristiano Ronaldo da Robert Lewandowski da kuma Harry Kane inda ya zura kwallaye mafi yawa a gasar neman tikitin shiga gasar Euro guda daya.
Dan wasan aro na Chelsea ya buga wasansa na 14 a wasannin share fagen da aka kammala kwanan nan a karawar da suka yi a Azerbaijan da ci 5-0 ranar Lahadi.
Tsohon dan wasan na Manchester United ya zura kwallaye hudu masu ban mamaki a cikin mintuna 20 tsakanin mintuna na 17 da 37 na wasan wanda hakan ya sa ya zura kwallaye 14 a wasanni takwas da ya buga wa Belgium.
Ana cikin haka ne Lukaku ya karya tarihin hadin gwiwa da Lewandowski da David Healy na Ireland ta Arewa suka yi, wadanda dukkansu suka zura kwallaye 13 a wasannin neman tikitin shiga gasar 2016 da 2008, bi da bi.
Ya kuma zarce Ronaldo da ya ci kwallaye 10 a matsayin wanda ya fi zura kwallaye a wasannin share fagen shiga gasar cin kofin Turai ta 2024.
Bayan Ronaldo a jadawalin kwallaye akwai Kylian Mbappe na Faransa wanda shi ne na uku a jerin ‘yan wasan da suka fi cin kwallaye da kwallaye tara, yayin da Kane ke da kwallaye takwas.
Subscribe to Our VIP Newsletter
[newsletter_signup_form id=1]
