Kuwait ta mikawa Indiya gawarwakin mutane 45 da gobara ta kona

Wani jirgin saman sojojin Indiya ya dawo da gawarwakin ma’aikatan Indiya 45 da suka mutu a wata mummunar gobara da ta tashi a Kuwait.

Gobarar ta tashi ne a ranar Laraba a wani gini da ke birnin Mangaf, inda ma’aikatan Indiya 176 suke.

Hukumomin Kuwaiti sun bayar da rahoton cewa gobarar ta lashe rayukan mutane 50 da suka hada da Indiyawa 45 da ’yan kasar Philippines uku, inda har yanzu ba a tantance mutane biyu da suka mutu ba.

A ranar alhamis, ministar Indiya Kirti Vardhan Singh ta isa Kuwait don taimakawa wajen gano waɗanda abin ya shafa da kuma saukaka komawa Indiya.

Singh ta ce ana gudanar da gwaje-gwajen DNA don tabbatar da asalin waɗanda suka mutu.

Kuwait, wacce ta dogara kacokan kan ayyukan baƙin haure, tana da kashi biyu bisa uku na al’ummarta da suka hada da ma’aikatan kasashen waje, musamman a bangaren gine-gine da na cikin gida.

Ƙungiyoyin kare haƙƙin bil’adama sun sha nuna damuwa game da yanayin rayuwar waɗannan ma’aikata.

Gobarar ta kuma raunata ma’aikata da dama waɗanda yawancinsu ‘yan ƙasar Indiya ne.

Gwamnatin Indiya na haɗa kai domin bayar da tallafi da kuma dawo da waɗanda abin ya shafa zuwa kasarsu. In ji BBC.