Dan takarar shugaban kasa a jam’iyyar All Progressives Congress, APC, Asiwaju Bola Ahmad Tinubu, ya ce, zai kawo karshen sace-sacen mutane, fashi da makami da sauran miyagun ayyuka idan aka zabe shi a zaben 2023 mai zuwa.
Tinubu ya bayar da wannan tabbacin ne a lokacin da yake jawabi ga dimbin jama’a a wajen gangamin jam’iyyar APC a Dutse, babban birnin jihar Jigawa, ranar Asabar.
Ya ce Najeriya za ta shawo kan dukkan matsalolinta idan aka zabe ta a matsayin shugaban kasa.
“Insha Allahu Najeriya za ta samu ci gaba, za mu kawo karshen tashe-tashen hankula, za mu kawo karshen sace-sacen jama’a da sauran miyagun ayyuka.
“Za ku iya zuwa gonakinku duk tsawon lokaci ba tare da tsoron sace-sace, yin fashi da kuma biyan kudin fansa ba.
“Ku zabe ni ku zabe ni don ci gaba, hadin kai, da wadata,” in ji Tinubu.
Shima da yake jawabi, Gwamna Muhammad Badaru Abubakar ya ce taron ya isa shaida cewa mutanen jihar sun yi amanna da gwamnatin APC.
“Wannan ya nuna karara cewa Jigawa ta APC ce domin har wasu daga cikin ‘yan takarar jam’iyyun adawa sun fara watsi da takararsu sun shiga kungiyar da ta yi nasara.
“Uba da dansa ne suka rage a jam’iyyar PDP ta Jigawa,” Gwamna Badaru ya bayyana.
Don haka ya bukaci al’ummar jihar da su fito kwansu da kwarkwata domin kada kuri’a ga daukacin ‘yan takarar jam’iyyar APC a zaben 2023 mai zuwa.
Subscribe to Our VIP Newsletter
[newsletter_signup_form id=1]
