Kotun Majistare da ke Kaduna ta bayar da umarnin tsare Mahadi Shehu, fitaccen mai sharhi daga Kaduna, har zuwa ranar 14 ga Janairu, 2025, domin ci gaba da sauraron ƙarar da ake masa.
Shehu na fuskantar tuhuma guda biyu, ciki har da haɗin baki da taimakawa ayyukan ta’addanci, wanda ya saba wa sashe na 26 (2)(3) na Dokar Hana Ta’addanci ta 2022, da kuma tada hankalin jama’a, wanda ya saba wa sashe na 78 na Dokar Penal Code ta jihar Kaduna ta 2017.
Alƙalin kotun, Abubakar Lamiɗo, ya bayar da umarnin tsare Shehu a gidan gyaran hali na Kaduna bayan da aka gurfanar da shi gaban kotu a ranar Talata.
Wannan tsarewar na zuwa ne bayan zarginsa da wallafa wani saƙon da ya nuna cewa gwamnatin tarayya na shirin kafa sansanin sojojin Faransa a Arewa maso Gabas, wanda gwamnatin Najeriya ta musanta.
Bincike daga kafafen yada labarai ya tabbatar da cewa bidiyon da aka yi amfani da shi wajen yada wannan zargi ba gaskiya ba ne, yana dauke da sojojin Najeriya a Arewacin Mali, kuma an fara wallafa shi a YouTube tun a watan Janairu na 2013.
Mahadi Shehu ya kasance a hannun hukumar tsaron farin kaya (DSS) kafin gurfanar da shi gaban kotu.
Subscribe to Our VIP Newsletter
[newsletter_signup_form id=1]
