Jirgin Hatsin Ukraine ya nufi Afrika

Jirgin ruwan Majalisar Dinkin Duniya na farko ya bar Ukraine tun bayan da Rasha ta fara mamaya inda ya nufi Habasha.

BBC ta ce, Jirgin ya bar Tekun Bahar Aswad dauke da tan dubu 23 na alkama zuwa Habasha.

Shirin samar da abinci na Majalisar Dinkin Duniya, wanda ke samun rabin alkamar da yake amfani da ita a yayin yaki daga Ukraine, ya ce mutum miliyan 345 a kasashe 82 na fuskantar karancin abinci in da suke bukatar agajin gaggawa.

Jiragen ruwa da dama dauke da hatsi ne suka bar Ukraine tun bayan yarjejeniyar da aka cimma ta barin fitar da hatsi daga Ukraine.