Jami’ar Bayero, da ke Kano (BUK), ta sake farfado da shirin share fagen shiga Jami’a domin taimakawa daliban da basu samu damar shiga karatun digiri kai tsaye ba.
A tuna cewa an dakatar da shirin shekaru fiye da goma da suka wuce.
Sanarwar ta fito daga bakin Shugaban jami’ar Bayero, Farfesa Sagir Adamu Abbas, a lokacin taron karrama na 59 na jami’ar da aka gudanar ranar Asabar, 14 ga Disamba, 2024.
A cewar Farfesa Abbas, shugabannin jami’ar sun yanke shawarar dawo da shirin share fagen shiga Jami’a saboda dalilai guda biyu masu muhimmanci.
“Na farko, an lura da raguwa mai yawa a yawan dalibai masu rajista a fannonin Kimiyyar Lissafi, kuma shirin share fagen zai taimaka wajen magance wannan matsalar ta hanyar shirya dalibai don karatun kimiyya.”
Ya bayyana cewa, dalibai da dama suna fuskantar matsala wajen cika bukatun shiga fannonin kimiyya.
“Shirin share fagen shiga jami’a zai ba wa wadannan dalibai goyon bayan ilimi da ake bukata, wanda zai kara musu damar samun shiga jami’a.”
Farfesa Sagir ya kara da cewa, dawo da shirin zai inganta damammakin ilimi ga daliban BUK kuma zai bada gudunmawa ga ci gaban jami’ar.
Subscribe to Our VIP Newsletter
[newsletter_signup_form id=1]
