Isra’ila ta saki Falasdinawa 25 bayan Hamas ta saki mutane 3

Hukumomin Isra’ila sun sako Falasɗinawa 25 da suke rike da su a gidan yari inda a yanzu suka isa garin Beitunia da ke yamma da Ramallah a yankin Gabar Yamma da Israilar ta mamaye.

An samu cincirundon jama’a da suka kewaye motar safa da ke dauke da fursunonin lokacin da suka isa garin.

Tun da farko an ga jerin motocin safa suna barin gidan yari na Ofer, inda yawancin fursunonin Falasɗinawan 183 da za a saki yau a musayar da ake yi da Isra’ilawan da Hamas ta yi garkuwa da su suke.

Tun da farko a yau din Hamas ta saki Isra’ilawa uku cikin wadanda ta yi garkuwa da su kamar yadda yarjejeniyar dakatar da bude wuta da aka fara ranar 19 ga watan Janairun da ya gabata ta tanada.