Hukumar Zaɓe Mai Zaman Kanta INEC, ta sanya Asabar 15 ga watan Afrilu a matsayin ranar ƙarasa zaɓukan da ba su kammala ba a jihohi da dama na ƙasar nan.
A wani saƙo da ta wallafa a shafinta na Twitter ranar Litinin, INEC ta ce, ta yanke wannan shawara ce, bayan wata ganawa tsakanin manyan jami’anta.
Akwai zaɓukan gwamnoni kamar a jihohin Kebbi da Adamawa, waɗanda jami’an sanar da sakamakon zaɓe suka ce ba su kammala ba a ranar 18 ga watan Maris, baya ga sauran zaɓukan ‘yan majalisun dokoki, da su ma suka fuskanci irin wannan cikas.
Ɗaya daga cikin jihohi da aka samu zaɓukan da ba su kammala ba masu yawa a ranar 25 ga watan Fabrairu, ita ce Sokoto, inda ake da ‘yan majalisar wakilai 11 da sanatoci 3 waɗanda duk zaɓensu bai kammalu ba.
Masu sa-ido sun soki hukumar INEC saboda matsalolin da aka samu a zaɓen shugaban ƙasa da na ‘yan majalisun tarayya na ranar Asabar 25 ga watan Fabrairu, wanda Bola Ahmed Tinubu, ya yi nasarar zama sabon shugaban ƙasa.
Haka ma a ranar 18 ga watan Maris lokacin da INEC ta gudanar da zaɓen gwamnoni da na ‘yan majalisar dokokin jihohi, an gamu da wasu daga cikin matsalolin da aka samu a zaɓen INEC na farko
Subscribe to Our VIP Newsletter
[newsletter_signup_form id=1]
