Wani dalibi dan jihar Kano da ke karatu a kasar Indiya, Abdulrazaq Nafiu Abubakar, mai shekaru 27, ya samu lambar yabo ta Vice Chancellor’s Gold Medal Award a kasar Indiya bayan da ya kammala karatunsa na farko a matsayin dalibin da ya fi kowa kwarewa a fannin fasaha a fannin Injiniya a Jami’ar Sharda ta kasar Indiya.
Abubakar daga karamar hukumar Nasarawa, wanda ya kamala karatun digiri na biyu da maki na CGPA 9.89 cikin 10.00 a kasar Indiya, ya karanta Mechatronics Engineering a Jami’ar Bayero ta Kano a lokacin da ya ke karatun digirinsa na farko, inda ya samu kyautar Ahmadu Adamu Muazu na 2019 a matsayin wanda ya fi kowa samun maki da CGPA 4.9 a tsangaya na Injiniya.
Bayan kammala karatunsa a shekarar 2019, matashin wanda ya kammala karatunsa ya samu gurbin karatu a kasashen waje ga dalibai 370 da suka kammala karatun digiri na farko a Kano, zuwa kasar Indiya domin samun digirinsa na biyu na Master’s na gidauniyar Kwankwasiyya.
Da a ka tambaye shi ta ya ya ya samu wannan nasara, sai ya ce”Duk abin yabo ya tabbata ga masu ba shi shawara wadanda su ka zaburar da shi tare da yi masa jagora har ya kai ga taron.
“To, babu abin da za a ce a kan yadda na fito a matsayin mafi kyawun ɗalibi, nufin Allah ne.
“Amma na san cewa na mai da hankali sosai a duk azuzuwan ilimi na, da kuma dakunan gwaje-gwaje,” in ji shi.
Ya kuma bayyana cewa mafi yawan lokutan hutun sa ya na amfani da su ne wajen ayyuka da bincike, domin ya na da sha’awar koyon kere-keren fasahar zamani.
Nafi’u ya kuma yi nuni da cewa, daya daga cikin manyan kalubalen da ya fuskanta a lokacin da ya ke karatun digiri na farko shi ne wahalar samun bincike a fannin karatunsa, domin wani sabon shiri ne a lokacin.
Yayin tattaunawar sa da DailyTrust, ya bayyana karatu a Indiya a matsayin wani sabon al’amari wanda ya samu damar koyo daban-daban, amma ya kara da cewa, yin karatu a cikin sabon yanayi da kuma lokacin COVID-19 ya na da kalubale, kuma ya na da wahalar jurewa.
Subscribe to Our VIP Newsletter
[newsletter_signup_form id=1]
