Gwamnatin Legas ta yi gargadi a kan sayar da gurbatattun lemuka

Gwamnatin jihar Legas ta yi gargadi ga cibiyoyin nishadi da ke cikin jihar game da sayar da kayan shaye-shaye na jabu.

Mai ba Gwamna Babajide Sanwo-Olu shawara na musamman kan harkokin yawon bude ido, fasaha da al’adu, Mista Idris Aregbe ne ya yi wannan gargadin a wata sanarwa da ya fitar ta shafinsa na Instagram.

A cewarsa, hakan ya biyo bayan karuwar damuwar da ake samu game da jabun shaye-shayen da ke yawo a kulake da gidajen abinci a fadin jihar.

Ya ce yawaitar shaye-shaye na jabu na haifar da babbar barazana ga lafiyar jama’a da kuma kare lafiyar al’umma, wanda hakan ya sa ofishinsa ya kara kaimi tare da hada kai don kawar da kayayyakin da ba su da inganci daga yaduwa.

“Muna kira ga dukkan kulake, gidajen abinci da wuraren jama’a da ake sayar da abubuwan sha da su yi aiki tuƙuru don tabbatar da cewa ba sa saye ko ba da abubuwan sha na jabu ga masu amfani da ba su ji ba,” in ji shi.

Aregbe ya baiwa jama’a tabbacin yin wani gagarumin yunkuri na kawar da jabun shaye-shaye a kasuwanni.

Ya yi bayanin cewa jihar za ta hada gwiwa da Daraktan bincike da tabbatarwa na hukumar kula da ingancin abinci da magunguna ta kasa, NAFDAC, Mista Ononiwu Ezeribe da kuma hukumar kare lafiyar jihar Legas karkashin jagorancin Mista Lanre Mojola.

Ya yi gargadin cewa duk wani wurin nishadi ko taron da aka samu yana yin hidima ko sayar da kayan sha na jabu zai fuskanci rufe nan take, tare da dakatar da lasisin gudanar da aiki.

Ya ce za a dauki tsauraran matakai don kare lafiyar mazauna Legas da masu ziyara.

Ya bayyana cewa ma’aikatar tana aiki tare da sauran hukumomin da abin ya shafa don tabbatar da cikakken bin ka’idojin kawar da jabun shaye-shaye.

Subscribe to Our VIP Newsletter

[newsletter_signup_form id=1]